Istorgias – Grond per pitschen

L’Uniun Rumantscha Grischun Central ò edia treis novs carnets cun istorgias per unfants tgi antschevan a liger. Las istorgias “Grond per pitschen” cuntignan istorgias scretgas da scolars dalla sagonda superioura dalla scola Surses. Chellas istorgias èn neidas inventadas digls scolars gronds per igls scolars pitschens. Igls treis volums cuntignan antot 17 istorgias. Chellas istorgias rachintan dad unicorns, draguns ed er striuns. Pero gl’è er da cattar istorgias da giats, meirs u gaglignas. La gronda part dallas istorgias èn neida localisada aint igl Surses. Per far attractiv igl liger cuntignan chels treis volums er istorgias noua tgi maletgs ramplazzan igls pleds. Per part èn las istorgias neidas illustradas digls scolars sez. La lavour da layout è neida fatga digl biro indigen da grafica e dessegn, tipic a Savognin.

Igls treis volums “Istorgias – Grond per pitschen” vignan mess a disposiziun gratuitamaintg alla biblioteca da Savognin scu er allas scolas primaras digl noss intschess tgi alfabetiseschan lour unfants an rumantsch grischun. Otras scolas tgi alfabetiseschan an rg pon s’annunztgier.

Chellas istorgias èn er cumpareidas an sutsilvan.

Uscheia sa preschainta igl codesch davains 

Chels treis volums duessan anritgier la schelta da lectura per unfants tgi antschevan a liger. Istorgias curtas, cumpactas e simplas. Istorgias tgi rachintan d’en mond da fantascheia tgi atteira igls unfants u er istorgias or digl mintgade. An tot cass ègl istorgias bagn tgapiblas ed illustradas cun blera calour.