Igl tgavrer

„Las tgoras da Stierva“ – chella expressiun vign duvrada anc oz cun en surreir per circumscreiver la populaziun da Stierva. Ansomma, mintga vischnanca an Surmeir ò en surnom spezial – e chels da Stierva èn las tgoras.  

Stierva e las tgoras  èn er igl  cuntign principal da chel codesch. Dad ena vart igl rachint da Gion Antona Candreia (1902-1980) e da l’otra vart las illustraziuns da Ludwig Demarmels (1917-1992). Dus persunalitads da Stierva, uneidas ainten en codesch.

La casualitad ò lia, tgi Linard Candreia, er uriund da Stierva, ò catto igl rachint betg anc publitgia da Gion Antona Candreia. G.A. Candreia, en scribent autentic ed original, da mastier sto igl davos rasteler a Stierva. „Igl tgavrer“ da G. A. Candreia è en scazi sociocultural scu er linguistic.

Igl codesch

Igl autour screiva dalla sia lavour e dallas sias aventuras scu tgavrer igl onn 1915, chegl durant l’amprema ghera mundiala. Tgi unfants u er giuvenils tgiravan las tgoras era en fatg, betg angal ainten las muntognas grischunas rumantschas. Perchegl vainsa er decidia d’edeir tal codesch an tots treis lungatgs uffizials grischuns. Igl bergagliot Gian Andrea Walther ò procuro per la translaziun talianga.

Graztga alla gronda lavour ed agl angaschamaint da Linard Candreia ans ègl pussebel da publitgier igl rachint da Gion Antona Candreia. Tg’igl rasteler da Sierva ò ansomma gia igl curasch da publitgier las sias istorgias, è er igl maret digl sies promotour Gion Peder Thöni (1921-2014), mademamaintg da Stierva.

L’Uniun Rumatscha Grischun Central ò grond plascheir e satisfacziun digl rachint triling „Igl tgavrer – Il capraio – Der Geisshirt“.